समकालीन कोंकणी एकांकी- प्रातिनिधीक कोंकणी एकांकी संग्रह: Samakaleen Konkani Ekanki- Collection of Representative Konkani Plays

Email

Whatsapp

Facebook

Pinterest

Twitter

Copy link

एकांकी आनी नाटक, 'नाट्य' ह्या एकाच प्रकारांत आस्पाविल्ली आसली तरी त्यो दोन वेगवेगळ्यो स्वतंत्र तरा. एकांकी ही आपल्या आपूण पूर्ण आनी स्वतंत्र नाट्यकृती आसा. एकांकीत घोटिवपण, संक्षिप्तपण आनी गती आसता, एकांकी एककेंद्री, एक रसात्मक, एक संस्कारी आसता. तिचो प्रवास स्थुलाकडसून सूक्ष्माकडेन वचपी. उरफाटें नाटकांत एकापरस अदीक संवेदनसूत्र, विस्तार आनी विलंब चलता.

एकांकीचे मुखेल तीन घटक आसात. कथावस्तु, पात्रांची येवजण आनी संवाद रचना. हेर घटकांमदें भाशा, शैली, वातावरण निर्मिती, उद्देश हांचो आस्पाव जाता.

कथावस्तू म्हणल्यार एकांकीचो आदार-खांब, तावेरूच ती उवी रावतली. कथावस्तू सशक्त नासत जाल्यार एकांकी म्हणल्यार निखट्या उतरांची कसरत थारू येता. कथावस्तुंतल्या घटनांचो क्रमूय चड्ट्टो आनी विकसीत आसूंक फाव. कथावस्तुचे मांडणेंत उमळशीक - उत्कंठा आसूंक फाव. ना जाल्यार एकांकी धील, फिकी आनी उबगण हाडपी जातली. ती संक्षीप्त जाय तशी बरी विणिल्ली जाय, गांठयिल्ली न्हय. कथावस्तुच्या एकवटांत वो मेळवणांत काळ, वेळ, सुवात, हालचाली हांचो समतोल जाय. एकांकीत संघर्श म्हत्वाचो. संघर्श प्रत्यक्षांतलो आसूं येता तसो अंतर मनांतलोय आसू येता. संघर्श आसल्यारूच एकांकीक गती येतली.

एकांकीचो दुसरो घटक म्हणल्यार पात्रांची येवजण, एकांकीक अवघींच पात्रां आसल्यार ती चड प्रभावी जाता. चरित्रप्रधान एकांकी आसल्यार उठावाक अदीक बरी. अर्थात उणी पात्रां आसून भागना. तांचेकडेन (कलाकारांकडेन) एकांकी पेलपाचें तितलेंच अभिनय कसब आसपाची गरज आसता. पूण समूह एकांकी Mob Play लेगीत तितलीच प्रभावी थारता.